1-ва Скопска - МТМ Телевизија

Општина Кисела Вода во соработка со Министерството за внатрешни работи, СВР Скопје – Одделение за превенција и ПСОН – Кисела Вода започна со реализација на кампања во основните општински училишта, со цел да се делува во насока на спречување на несакани последици по безбедноста на учениците во периодот на претстојните новогодишни и божиќни празници.

Реализацијата на кампањата, соопшти Општина Кисела Вода, започна од ООУ „Круме Кепески“ каде пред учениците од седмо, осмо и деветто одделение полициски службеници одржаа едукативен час за превенција и за спречување последици од употреба на пиротехнички средства.

Волонтери од „Црвен крст“ на учениците им покажаа како да укажат прва помош при повреда настаната од петарди. Во периодот што следува вакви едукативни предавања ќе се одржат и во останатите основни училишта.

Претставници од Министерството за внатрeшни работи ќе остварат средби и со советите на родители при основните училишта пред кои ќе ја презентираат кампањата.