1-ва Скопска - МТМ Телевизија

ЈП Водовод и канализација – Скопје го објави неделниот извештај за квалитетот и безбедноста на водата за пиење, добиен од анализите спроведени во Секторот за санитарна контрола.

Според извештајот од секторот, во периодот од 29.06.2020 до 03.07.2020 земени се 899 примероци за физичко-хемиска и 899 примероци за микробиолошка анализа на вода за пиење од 56 мерни места во град Скопје и согласно добиените резултати од испитувањата, сите примероци ОДГОВАРААТ на Правилникот за барања за безбедност и квалитет на водата за пиење, информираат од претпријатието.

САНКЦИОНИРАНИ 158 НЕПРОПИСНО ПАРКИРАНИ ВОЗИЛА ВО ЦЕНТАР

ЈП Паркинзи на Општина Центар и Општина Центар во соработка со Сообраќајната полиција-Скопје минатата недела санкционираа 158 непрописно паркирани возила кои го попречувале нормалното и безбедно одвивање на сообраќајот, информираат од претпријатието.

Во периодот од 29.06. до 05.07.2020 година, со помош на специјалните возила „Пајак“ на ЈП ПОЦ отстранети се 76 непрописно паркирани возила, а со поставување на механичко средство „Блокатор“ санкционирани се 82 возила кои биле затекнати во резидентни зони, а не биле корисници-резиденти на секторот во којшто биле паркирани.

СО НОВИ ПРОЗОРЦИ ЗА „МАЈСКИ ЦВЕТ“- ПОНИСКИ СМЕТКИ ЗА СТРУЈА

Завршени се работите околу целосна замена на прозорците на детската градинка „Мајски цвет“ во Тафталиџе 1. На овој начин се подобри енергетската ефикасност на објектот, а со тоа се намалуваат и трошоците за потрошувачка на електрична енергија, информираат од општината.

Во градинката „Мајски цвет“ веќе извесен период се работи и на други реконструкции, имајќи предвид дека овој објект долги години беше во руинирана состојба.