1-ва Скопска - МТМ Телевизија

На десетина улици во општина Ѓорче Петров на кои има голема фреквенција на возила, а каде што имало и поплаки од жителите дека се вози бргу, се поставени т.н. легнати полицајци.

Како што посочуваат локалните власти, со оваа акција, која ќе продолжи и натаму, целта е да се подигне безбедноста во сообраќајот, а со тоа да се спречат евентуални несреќи што може да се случат.

„На барање на жителите поставени се препреки за намалување на брзината на возилата на повеќе фреквентни локации и улици во урбаните заедници и во близина на училиштата и детските градинки“, посочи градоначалникот Александар Стојкоски.

Меѓу улиците опфатени се „Кичевска“, „Злате Михајловски“, „Ѓуро Салај“, „Мице Козар“, „Островска“, „Црногорска 2“, „Арсениј Јовков“, „Мечкин Камен“, улиците „1596“, „49“.

Како општина, Ѓорче Петров апелира возачите да внимаваат и да ја приспособуваат брзината со која се движат во согласност со законските регулативи.