1-ва Скопска - МТМ Телевизија

Шпанскиот премиер Педро Санчез денеска ќе соопшти дали има намера да поднесе оставка поради обвиненијата за корупција против неговата сопруга Бегоња Гомез, пренесува дпа. Неговата канцеларија утринава соопшти дека одлуката ќе ја соопшти напладне, пренесува Ројтерс.

Во средата, Санчез неочекувано објави дека размислува да замине. Потоа ги откажа сите закажани состаноци и рече дека својата одлука ќе ја соопшти во понеделник.

Санчез, социјалист кој ја презеде функцијата во 2018 година, напиша на „Икс“ дека мора да размисли дали да остане на функцијата со оглед на неоснованите обвинувања против неговата сопруга.

Тој рече дека треба да одлучи дали „вреди“ да остане на функцијата и покрај „јамата од кал“ што ја прават десницата и крајната десница од политиката. „Дали јас треба да продолжам да бидам на чело на владата или да застанам долу“, рече Санчез.

Според Уставот, доколку Санчез поднесе оставка, кралот Фелипе Шести ќе мора да се консултира со лидерите на политичките партии пред да предложи наследник.

Санчез, исто така, може да остане на функцијата и да оди на гласање за доверба во парламентот или да распише предвремени избори.

Повеќе од 10.000 луѓе протестираа во Мадрид во саботата, повикувајќи го да остане на функцијата.

Околу 5.000 излегоа на улиците на шпанската престолнина во неделата навечер со транспаренти кои го повикуваа да не поднесува оставка. Тие ја обвинија и десницата дека прибегнува кон „уцена“ и „лажни вести“.