1-ва Скопска - МТМ Телевизија

Повеќе градоначалници денеска ја потпишаа ,,Декларацијата за отвореност, отчетност и транспарентност на локалната самоуправа,,. Целта на овој документ е да се подобри транспарентноста и отвореноста на една општина и активностите кои се финансирани од јавни пари мора да бидат јавни и лесно достапни за граѓаните.

Во организација на Фондацијата за интернет и општество Метаморфозис и како ко-организатори Општините Гази Баба и Карпош, денеска повеќе општини од Скопје и Македонија ја потпишаа ,,Декларацијата за отвореност, отчетност и транспарентност на локалната самоуправа,, кој треба да придонесе за поголема достапност на информации и информациите за трошењето на јавните пари да биде подостапно до граѓаните. Принципот на транспарентност на една општина подразбира објавување на информации за организациската структура, буџетот за работа и објавувањето и пристапот до информациите за јавните набавки. Според досегашната пракса општините не ги објавувале ниту договорите, ниту анексите на договорите склучени на отворени јавни набавки.

Градоначалниците на скопските општини Гази Баба и Карпош кои воедно се ко-организатори на настанот истакнаа дека ќе ја почитуваат оваа декларација и повеќето од информациите ќе ги направат јавни и лесно достапни, а овој начин според градоначалниците веќе започна да се применува, односно информации кои претходно не биле објавени, сега се објавуваат на интернет страните на општините и социјалните мрежи.

Според фондацијата Метаморфозис последниот регионален резултат на отвореност на локалната самоуправа е разочарувачки и изнесува само 34%. Политиката на отвореност мора да биде политика на сите општини и таа мора да го најде своето место помеѓу другите важни државни политики.