Германија воведе строги мерки: рестораните, кината и баровите ќе бидат затворени 4 недели

Германската канцеларка Ангела Меркел изјави денеска дека германските власти се согласиле на четиринеделен делумен карантин.

Во овој временски период затворени ќе бидат рестораните, баровите, кината, театрите и други слични објекти, во обид да се запре ненадејното зголемување на заразата со коронавирус.

Одлуката треба да стапи на сила в понеделник и ќе трае до крајот на ноември, пренесува АП.

Продавниците и училиштата ќе останат отворени, за разлика од затворањето на Германија за време на првата фаза од пандемијата во март и април.

„Мора да дејствуваме сега, за да избегнеме акутна национална здравствена криза“, рече Меркел.

Канцеларката апелираше до луѓето да не одат на патувања што не се потребни и рече дека хотелите нема да можат да примаат туристи.

Меркел вети дека компаниите погодени од новиот делумен карантин ќе добијат економска поддршка, велејќи дека помалите компании ќе добијат 75% од своите приходи како поддршка, пренесува „Ројтерс“.

„Ние ќе ги обештетиме погодените компании, институциите и клубовите“, рече германската канцеларка.

Највисок дневен биланс на новозаразени

Според последните информации, во последните 24 часа во Германија се потврдени нови 14.964 случаи на коронавирус, што е највисок дневен биланс од почетокот на епидемијата, објави Институтот „Роберт Кох“.

Претходниот рекорд беше поставен во саботата, кога беа евидентирани 14.714 нови случаи на заразени, и оттогаш се намалува дневниот број на нови случаи.

27 лица починаа од последниот пресек, пренесува „Ројтерс“.

Од почетокот на епидемијата, вкупно се заразени 464.239 лица, од кои 10.125 починале.





Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk



Можеби ќе ве интересира:

Сите статии објавени на МТМ.мк се во согласност со ИАБ етичкиот кодекс


© MTM ТВ Дооел - Скопје. Сите права се заштитени.