1-ва Скопска - МТМ Телевизија

Заменик-претседателот на Владата задолжен за европски прашања, Никола Димитров, денеска оствари средба со амбасадорот на Шпанија во Северна Македонија, Емилио Лоренцо Сера.

Вицепремиерот Димитров се надоврза на дискусијата остварена на средбата во октомври 2020 година, при што го информира шпанскиот амбасадор за континуираната посветеност на процесот на пристапување и ја претстави „Агендата: Европа дома“, со која се потврдуваат заложбите за испорака на резултати во приоритетните области од кластерот „Темели“ изразувајќи надеж дека одлуката за почеток на пристапни преговори со Северна Македонија од март 2020 година ќе се ефектуира во пресрет на идниот европски самит, информираат од неговиот кабинет.

„Оваа година е можеби клучна година за одржување на кредибилитетот на ЕУ во регионот, што е од стратешки интерес и за земјите членки како можност за развој на модалитетите за продлабочување на билатералната соработка. Благодариме за поддршката на Мадрид, а имаме интерес и за техничка помош во клучните реформски области заради постигнување одржливи резултати“, истакна Димитров.

На средбата била реафирмирана поддршката од шпанска страна за европската перспектива на државата за што е неопходно почнување на преговорите за членство со Унијата што е можно побргу, а беше разговарано и за можностите за зајакнување на билатералната соработка помеѓу двете држави во главните реформски област, но и економската и инвестициската рамка.