Половина милион евра за развој на авантуристички туризам на Пониква

Локалната самоуправа на Кочани обезбеди над 30,5 милиони денари за реализација на проектот „Планински велосипедски рај“ што ќе се реализира на Осоговските Планини.

 

Станува збор за проширување на туристичкиот потенцијал и за создавање услови за развој на авантуристичкиот туризам, како дел од вториот повик за инвестиции во инфраструктурата поврзана со туризмот на Единицата за спроведување на проектот „Локална и регионална конкурентност“, финансиран од грант од Европската Унија.

 

-Целта на проектот „Планински велосипедски рај“ е да развиеме едно уникатно планинско авантуристичко искуство. Тоа ќе се овозможи со изградба и обновување на велосипедски планински патеки, обновување на планинарскиот дом, проширување на паркингот и развој на други услуги за поддршка на овој вид туризам. Проектот е поврзан со постојната инфраструктура и се вклопува во стратешките цели на општината за збогатување на туристичката понуда, истакна Сашо Стоименов од секторот за планирање и развој на Општина Кочани.

 

Проектот „Планински велосипедски рај“ опфаќа изградба на патеки за планински велосипедизам на Осоговските Планини во вкупна должина од 35 км, на релацијата Пониква – Брана Гратче – Кочани. Планирана е и изработка на интерактивна апликација за мобилна телефонија, со податоци за планински велосипедизам што ќе вклучува презентација на геореферентни податоци на  јавно достапните мобилни мапи.

 

Изградбата на велосипедските патеки и останатите придружни содржини ќе почне идната година и треба да се реализираат во период од 12 месеци.





Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk



Можеби ќе ве интересира:

Сите статии објавени на МТМ.мк се во согласност со ИАБ етичкиот кодекс


© MTM ТВ Дооел - Скопје. Сите права се заштитени.