Францускиот дипломат Ле Роа во Скопје

Францускиот амбасадор и поранешен специјален пратеник на ЕУ во земјата во 2001 - 2002 година, кој важи за пријател на Македонија, Ален Ле Роа од денеска до 22 септември ќе престојува во посета на Република Македонија.

 

Како што соопштија од француската Амбасада, во неговата агенда се вклучени серија средби со политички претставници од мнозинството и од опозицијата, при што амбасадорот ќе има можност да разговара во Скопје и во Тетово за перспективите на земјата при успешен референдум, што е услов за Македонија да направи решавачки чекор на својот европски пат. 

 

Два приеми во резиденцијата на Франција ќе бидат организирани во рамките на посетата, еден за членовите на групата за пријателство Франција-Македонија и вториот по повод одржувањето на Патувачкиот француско-германски универзитет на Балканот, во соработка со Правниот факултет во Скопје и во присуство на министрите за одбрана, правда и образование, како и на професори и студенти. 

 

Амбасадорот Ле Роа ќе се приклучи кон сенаторката од Ивлин и претседател на групата за соработка Франција - Западен Балкан,  Марта де Сидрак и кон заменик претседателот на групата на интерпарламентарна соработка задолжен за Македонија, сенаторот Арно Базен, на конференцијата во Дипломатската академија при Министерството за надворешни работи каде што ќе се сретне со дипломати, новинари и македонски невладини организации и ќе има можност да разговара пред широка публика за актуелната состојба во земјата. 

 

Ле Роа како специјален претставник на ЕУ за Македонија во 2001 и 2002 година, во рамките на својата тогашна мисија, како што наведуваат од Француската Амбасада, ѝ помогна на земјата повторно да ја воспостави меѓуетничката доверба и да го врати својот углед во Европа. Беше генерален секретар на Обединетите нации задолжен за мировни операции (2008-2014), како и амбасадор во Италија (2011-2014) и генерален секретар на Европската служба за надворешни работи за периодот од јануари 2015 до август 2016 година.

 

Ле Роа има долгогодишно искуство за состојбите во регионот, како заменик специјален координатор на ООН во Сараево во 1995 година и префект на Пеќ во периодот 1999 - 2000 година, но исто така и во врска со економските состојби, како директор за економски прашања при Министерството за надворешни работи (2002-2005).

 

Франција внимателно ги следи случувањата во Македонија и останува посветена заедно со земјата, во 2018 година, како што беше и во 2001, за да ја придружува на патот на нејзината европска интеграција, стои во соопштението од Амбасадата на Франција.

 

 

 





Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk



Можеби ќе ве интересира:

Сите статии објавени на МТМ.мк се во согласност со ИАБ етичкиот кодекс


© MTM ТВ Дооел - Скопје. Сите права се заштитени.