Проектот „СЕГА“ од група автори е официјален претставник на Интернационалната изложба на архитектурата во Венеција

Министерството за култура информира дека Комисијата во состав: Трајче Блажевски, Имер Бајрами, Џемил Бектович, Агрон Салиу и Александар Андовски, ги разгледала пристигнатите пријави на Конкурсот за финансирање проекти од национален интерес од областа на меѓународната дејност за учество на Македонија на 17-тата Интернационална изложба на архитектурата во Венеција.

Одлучено е национален претставник на нашата држава оваа година да биде проектот на проектантското биро „Бина архитектура ДООЕЛ“ насловен „СЕГА“ од авторот Бекир Адеми со група коавтори: Ана Рафаиловска, Јордан Шишовски, Амине Адеми, Енис Абовски, Енес Север, Дрен Невзати, Атанас Наумовски, Гаврил Бошковски, Елмедина Хасани, Нита Чавoли, Аида Бакали Салиху, Ивана Чаловска.

Комесар на проектот е Дита Старова-Ќерими, директор на Националната галерија на Република Северна Македонија, куратори се Бекир Адеми и Јордан Шишовски, а соработници на проектот се проф.д-р. Ферид Мухиќ и Рамуш Муарем.

Во пропишаниот рок на Конкурсот, во Министерството за култура пристигнаа 2 пријави и тоа за: проектот на Друштвото за проектирање, инженеринг и услуги „Бина архитектура ДООЕЛ“ претставувано од архитектот Бекир Адеми предложен од Националната галерија на Република Северна Македонија и проектот на Благоја Бајковски.

„При увидот во пријавите, Комисијата утврди дека проектот на Благоја Бајковски не ги исполнува условите пропишани во Конкурсот, односно дека на Конкурсот право на учество имаат правни лица, односно установи од областа на културата (национални, локални, приватни), здруженија, сојузи, асоцијации и други субјекти регистрирани за вршење на дејност од областа на културата/архитектурата. Токму затоа, проектот на Бајковски не бил земен предвид во натамошниот процес на разгледување и одлучување“, информираат од Министерството за култура.

Оттука додаваат дека Комисијата при разгледувањето на проектите работела согласно со јасно и прецизно утврдените приоритети, критериуми, услови и доставената задолжителна документација наведена во Пријавата која што е составен дел од Конкурсот.

Избраниот проект „СЕГА“ е симболична претстава на еден отсечок од мноштвото и непосредна асоцијација на човековата идеја за дом и соживот. Сето ова концептуално открива два аспекти на просторно-временското суштествување, потребата од издвојување и заштита наспроти потребата за симбиотска релација со околината. Концептот се материјализира во дрвена композиција составена од дрвени елементи меѓусебно поврзани во една единствена хармонична просторна структура, архепитизирана рамка, асоцијација на куќа, дом и засолниште. Тимот кој ќе го подготви павилјонот е сочинет од архитекти, инженери, графички дизајнери и уметници со различна професионална специјализација и лица со различна етничка провениенција, кои ќе го претставуваат мултиетничкиот карактер на Република Северна Македонија.

Интернационалната изложба на архитектурата во Венеција оваа година ќе се реализира во периодот од 23 мај до 29 ноември и носечна тема е „Како ќе живееме заедно“. Куратор на годинашното издание на Биеналето е Хашим Саркис, архитект и експерт на Универзитетот МИТ во САД.





Забрането копирање на авторска содржина без претходна писмена потврда од МТМ ТВ ДООЕЛ. Доколку сметате дека вашето авторско право е прекршено ве молиме да не контактирате на info@mtm.mk



Можеби ќе ве интересира:

Сите статии објавени на МТМ.мк се во согласност со ИАБ етичкиот кодекс


© MTM ТВ Дооел - Скопје. Сите права се заштитени.