1-ва Скопска - МТМ Телевизија

По 11-ти пат големиот христијански празник Водици беше одбележан и во Општина Илинден, во соработка на општината со црквата Св. Константин и Елена.

Во водите на езерото кај хотелот Белви точно напладне со посебен црковен обред беше фрлен симболот на среќата- крстот, по повод христијанскиот празник Водици, ден на кој според светото предание Св.Јован Крстител го крстил Исус Христос во водите на реката Јордан. Се смета дека најсреќниот верник, кој ќе го фати крстот, цела година ќе го следи среќа, здравје и благосостојба, а најсреќен оваа година во Илинден беше 31-годишниот Дејан Ристовски од Марино кој петта година се фрла по крстот, а првпат е најсреќен и успева да го фати крстот.

Најсреќниот оваа година од општината и Јавните претпријатија доби вредни награди, Градоначалникот на Општина Илинден Жика Стојановски е задоволен од организацијата и смета дека оваа манифестација од година во година е се попосетувана од граѓаните и на сите им посака здравје, среќа и бериќет.

Како и минатите години така и оваа посетеноста на овој настан беше голема. По крстот оваа година се фрлија 55 учесници, а годинава за првпат во Општина Илинден беше пријавено и едно женско. За сите посетители кои беа присутни на оваа манифестација општината им обезбедни бесплатни топли пијалоци.