1-ва Скопска - МТМ Телевизија

Со богата културно уметничка програма, доделување награди од повеќе области, и обраќање на градоначалникот Борис Георгиевски, општина Гази Баба го прослави 42 роденден, и едногодишниот мандат на градоначалникот.

За просперитетот на оваа скопска општина, како што рече Георгиевски се заслужни како тој, така и сите негови претходници. Големи инфраструктурни зафати се правеле во минатото, а ќе продолжат и во иднина, со единствена цел, овозможување на граѓаните достојни услови за нормално функционирање.

За поголем поттик и мотивација, како и со цел изразување на благодарност за успешното досегашниот творештво и делување на територијата на Гази Баба, општината им додели награди на повеќе успешни поединци од оваа скопска општина. Младата Викторија Тодоровска, и Роберт Ангеловски се едни од нив.

Викторија беше учесник на зимските олимписки игри во Пјонг Чанг, Јужна Кореја, и со тоа претставува гордост за општината, која секогаш и помага и финансиски ја поддржува. Додека пак, Роберт веќе четири години успешно ги воведува децата од Гази Баба во светот на фолклорот преку ансамблот „ Седенка“.

Роденденската манифестација ја збогатија и настапите на Синтезис, Квартетот на виолинистката Пламенка Трајковска, но најголема реакција кај присутните предизвика настапот на Татјана, Андреј, Наталија и Никола од танцовиот клуб Ритам Плус.

Манифестација се затвори со ветување за понатамошно интензивно работење на општинската администрација, со цел реализација на ветените проекти.