1-ва Скопска - МТМ Телевизија

Европската Унија со отфрлањето на руската енергија си прави економско самоубиство, изјавил претседателот на Руската Федерација, Владимир Путин, на состанокот посветен на ситуацијата во нафтениот сектор, според медиумите во регионот.

„Денес гледаме дека од апсолутно политички причини, поради сопствените амбиции и под притисок на американскиот господар, европските земји воведуваат нови санкции на пазарите на нафта и гас. Сето тоа води кон пораст на инфлацијата и наместо да ги признаат своите грешки, тие бараат виновници од страна“, кажал Путин, пренесува РИА Новости.

Тој посочил дека Европа на долг рок ќе стане регион со високи цени на енергијата.

„Се добива впечаток дека нашите западни колеги, политичари и економисти едноставно ги заборавија основите на елементарните економски закони или, на нивна штета, претпочитаат намерно да ги игнорираат“, рекол Путин, според извештајот на „Спутник интернешнал“.

Тој додал дека недвосмислено, заедно со енергетските ресурси на Русија, од Европа во другите региони во светот ќе замине и економската активност.

„Таков економски автогол или самоубиство е се разбира, внатрешно прашање на европските земји. Мораме да се однесуваме прагматично и да тргнеме првенствено од сопствените економски интереси“, нагласил Путин.

Тој ги повикал руските власти да дејствуваат проактивно во услови на „безумни и хаотични“ акции преземени од некои од западните партнери и тоа да го свртат во корист на Москва.