1-ва Скопска - МТМ Телевизија

Реновирање на стационарот Вардариште, спречување на појавата на неодговорно сопствеништво и неконтролирано размножување на кучињата во домашни услови и чепирање на домашните кучиња се дел од решенијата за да се надмине проблемот со кучињата чиј број е се поголем на улиците и да се спречат случаите во кои беа нападнати случајни минувачи.

Од здруженијата за заштита на животните сметаат дека една од мерките за надминување на проблемот е да се спречи неконтролираното размножување на домашни кучиња бидејќи две третини од нив завршуваат на улица како скитници. Радмила Пешева од здружението "Анима мунди“" која воедно е и член на работната група која ја следеше состојбата во стационарот Вардариште истакна дека се работи за повеќе децениски проблем којшто бара пристап од повеќе аспекти.

Во Агенцијата за храна и ветеринарство, како што истакнаа од работната група, веќе имаа одреден буџет за чипирање на кучињата и имаат софтвер за ваква намена, но тој не е функционален.

Извештајот на работната група која ја следеше состојбата во стационарот Вардариште покажува дека условите за згрижување и третман на кучињата се несоодветни и оти е потребно негово реновирање. За таа цел, во буџетот за следната година се предлага да се одвојат 10 милиони денари за реновирање на овој стационар.