Комплетирани првите осминафинални средби од Лигата на фудбалските шампиони.

Наполи на Горан Пандев го победи Челзи на Сан Паоло со 3:1. Челзи го отвори резултатот со голот на Хуан Мата во 27 минута, но радоста на гостите кратко траеше. На 1-1 израмни Лавеци во 39 минута, а Кавани во 2 минута од судиското продолжување на првото полувреме го доведе Наполи во водство со 2-1. Конечниот резултат го постави Лавеци, со својот втор гол на мечот во 65 минута.

Горан Пандев ги одигра последните 10 минути од натпреварот, кога влезе во игра на местото на Лавеци. Пандев еднаш успеа да се закани кон голот на Челзи, но неговиот удар беше непрецизен.

На вториот вчерашен натпревар што се играше од 18 часот во Москва фудбалерите на ЦСКА и Реал Мадрид одиграа нерешено 1:1 во првиот натпревар.

Ова беше прв меѓусебен натпревар во историјата на овие два клуба, а патникот во четврфиналето ќе биде познат по реванш мечот од осмина финалето на Лигата на шампионите, што на 14 март ќе се игра во Мадрид на Бернабе. Гостите поведоа во 28 минута преку Кристијано Роналдо, а изедначи Швеѓанецот, Понтус Верблум во последната минута од судиското надополнување.

Ракометарите на Вардар про забележаа минимална победа од 23-22 на гостувањето во Шабац против тимот на Металопластика на дуелот во рамките на СЕХА лигата.

Со триумфот, кој беше обезбеден во последната минута од возбудливиот и неизвесен натпревар, „црвено-црните“ избија на чело на табелата на регионалното балканско натпреварување.

Најефикасни со по 6 постигнати гола беа Ратко Николиќ од Вардар и Милош Митровиќ од Металопластика.

Денеска ќе се одиграат уште 4 натпревари од ова натпреварување, а настап ќе има и македонскиот шампион Металург, каде во Автокоманда го пречекува Борац од Бања Лука.

Карлос Тевез конечно му се извини на Манчестер Сити.

Аргентинскиот напаѓач е во конфликт со раководството на Сити од септември наваму, кога одби да влезе во игра на дуелот со Баерн Минхен во Лигата на Шампионите. Тој се врати во својата татковина без дозвола на клубот и беше казнет.

Менаџерот Роберто Манчини првично објави дека Тевез нема да игра повеќе за тимот, а потоа рече дека напаѓачот треба да се извини за да се врати во тимот.

Истото Тевез и го направи, поради желбата да почне повторно да игра за Манчестер Сити.

Од клубот открија дека Тевез се подготвува и би требало да се врати во игра за околу две недели.

Само 5 средби се одиграа синоќа во НБА лигата, каде домаќините имаа 100% учинок.

Најпрво Портланд не само што успеаја да ја прекинат серијата на Сан Антонио од 11 победи, туку и ги прегазија со 40 разлика. Сан Антонио реши да ги одмори Данкан и Паркер, а тоа многу влијаеше на играта. Водството на Портланд достигна до 48 поени, а на крајот со победата од 137:97 ја прекинаа победничката серија на Сан Антонио која траеше цели 11 натпревари. Ламаркус Олдриџ со 21 поен беше најефикасен во победничкиот тим. Леонард со 24 поени и 10 скокови беше најдобар кај Сан Антонио.

Двејн Вејд со 30 поени и 10 асистенции беше најзаслужен за седмата победа во серија за Мајами, против Сакраменто со 120-108. Во другите средби Индијана во продолжението го победи Њу Орлеанс, а Кливленд минимално со 101-100 беше подобар од Детроит.

Домашна победа забележа и Мемфис против Филаделфија со 89-76.

За вечерва на програмата дури 13 средби.
 

Во лигата на фудбалските шампиони денеска и утре на програмата се последните први осминафинални средби.

Денеска нашиот Горан Пандев и Наполи го пречекуваат Челзи на Сан Паоло.

Домаќините во овој натпревар влегуваат по убедливата победа од 3-0 во Фиренца.

Челзи игра очајно, тимот на Андре Вилаш Боаш нема победа на последните четири натпревари, а во саботата одигра само 1-1 против второлигашот Бирмингем.

Проблем за Наполи може да биде суспензијата на Валтер Мацари, кој и двата дуели против Челзи ќе мора да ги следи од трибините. Челзи веројатно ќе настапи без капитенот Џон Тери кој сеуште не се опоравил од повредата.

Во првиот натпревар од денешната програма денеска играат во Москва ЦСКА и Реал Мадрид.

Домаќините се соочуваат со голем број повредени фудбалери, па само студеното време и вештачката трева на стадионот одат во нивен прилог.

Реал Мадрид во 1/8 финалето влегува по фантастичниот скор во групната фаза во која ги доби сите натпревари и прими само еден гол и е голем фаворит во овој дуел.

Утре на програмата играат Марсеј - Интер и Базел - Баерн Минхен.

Шпанскиот фудбалер и член на Шалке Раул Гонзалес изминатиот викенд го постигна својот јубилеен 400 погодок во својата фудбалска кариера.

Иконата на Реал Мадрид сега е миленик на навивачите на бундеслигашот Шалке 04, а на дуелот со Волфсбург постигна гол за кој ниту самиот не знаеше дека ќе му означи едно неверојатно постигнување кое започна од есента 1994 година, кога како 17-годишно момче за првпат дебитираше во сениорскиот тим на Реал Мадрид.

Раул во својата кариера постигна 323 гола за Реал Мадрид, 44 погодоци во дресот на шпанската фудбалска репрезентација, а по 33 пат се запиша во листата на стрелците како член на Шалке 04 во Бундес - лигата.

Започна уште еден тениски турнир од ВТА серијата во Дубаи кој е со награден фонд од 2 милиони долари. Се играат натпреварите од првото коло, а таму пласман во следното коло обезбедија Пер, Кириленко, Пенета, Бенесова, Јанковиќ и германката Гергес која ја победи фаворитката Светлата Кузнецова со 2-1 во сетови 2-6, 7-6 и 6-4.

Денеска продолжуваат натпреварите од ова коло, а најинтересно се очекува да биде на мечот помеѓу Ана Ивановиќ и Франческа Скијавоне.

Формула 1 тимот на Мерцедес ГП, на 26 дена до стартот на новата сезона, го презентираше новиот болид со кој ќе се натпреварува во новото првенство.

Болидот, кој седумкратниот светски првак Михаел Шумахер и неговиот колега Нико Розберг, го презентираа на патеката Каталуња, во Барселона, ја носи ознаката Њ03.

Со новиот болид, Шумахер и Розберг се надеваат дека ќе можат да им се спротивстават на трите водечки тимови во Формула 1, Ред Бул, Мекларен и Ферари.

Изминатата ноќ во НБА лигата беа одиграни 11 натпревари, на кои екипите кои играа на гостински терен забележаа само 3 победи. Дерон Вилијамс го предводеше Њу Џерси до победата во локалното дерби против Њујорк во Медисон Сквер Гарден со 100:92. Вилијамс постигна 38 поени, а Џереми Лин со 21 поен ја предводеше стартната петорка на Њујорк која заврши со двоцифрен број на поени.

Тони Паркер постигна 23, а Тим Данкан и Мет Бонер по 20 поени, во победата на Сан Антонио од 106:100, во Солт Лејк Сити против Јута. Спарси стигнаа до 11 победи по ред. Гостинска победа, од 93:90 забележа Орландо во Милвоки, а Двајт Хауард со 28 поени и 16 скока беше прво име на натпреварот.

Оклахома забележа победа над Њу Орлеанс од 101:93. Бековскиот тандем Расел Вестбрук и Кевин Дурент со по 31 поен ја предводеа Оклахома до 27-та победа, во 32-от натпревар сезонава.

Чикаго Булс, лесно се справи со Атланта. Булси победија со 90:79, со што ја забележаа 26-та победа во првенството. Дерик Роуз со 23 поени го предводеше Чикаго до победата.

Дирк Новицки со 26 поени и 16 скока беше најдобар во редовите на Далас, кој на домашен терен го совлада Бостон со 89:73.

Триото, Брајан - Гасол - Бајнам, беше најзаслужно за победата на ЛА Лејкерс против Портланд од 102:93. Брајант постигна 28 поени, а центарскиот двоец запиша двоен ефект: Бајнам 14 поени и 19 скока, Гасол 16 поени и 12 скока.

Монта Елис уфрли 32 поени, а Дејвид 24, во победата на Голден Стејт над ЛА Клиперс од 104:97.

Во поразениот тим Крис Пол постигна 24, а Блејк Грифин 21 поен.

Вечерва во НБА лигата треба да се одиграат 5 средби.

Во кошаркарската Супер лига на Македонија се одиграа натпреварите од 4.коло.

Изненадување направи тимот на Лирија која го совлада МЗТ Скопје нагости со 85-88. Тони Симиќ со беспрекорен процент на реализација во текот на целиот меч и со 7 погодени тројки во 7 обиди и вкупни 29 поени беше клучен во триумфот на неговиот тим кај претендентот за титулата.

МЗТ Скопје во завршните моменти пропушти преку слободните на Чековски да дојде барем до израмнување по што двата бода од овој дуел отпатуваа за Сарај.

Покрај Симиќ, и Тасовски имаше солидно издание за Лирија, уфрли 18 поени.

Кај МЗТ репрезентативниот центар, Тодор Гечевски беше прв стрелец со 25 поени.

Со овој пораз МЗТ има биланс од 16 победи и 4 порази и повторно се најде на второто место зад Фени Индустри кој има бод повеќе на врвот од табелата.

Фени немаше проблеми со Торус и го совлада со 75-67.

Куманово нагости го совлада Работнички со 92-98 и го отпиша од плејофот.

Петтото првенствено коло е следниот викенд, а го носи дербито меѓу МЗТ Скопје и Фени Индустри кој ќе се одигра во салата Јане Сандански.

Со евентуална победа МЗТ повторно ќе се најде на врвот на првенствената табела.